Ukitanguliza mwili,
Nyuma ifate akili,
Hupati pendo la kweli,
Na roho hugawanyika!
Siukimbilii mwili,
Najua wake muhali,
Umkutapo baradhuli,
Pendo sumu hugeuka.
Naitafuta akili,
Tena kwa hali na mali,
Sio kwayo taamuli,
Bali kwayo tajamali.
Naitafuta kauli,
Murua tena sahili,
Itoayo afadhali,
Mashaka yanaponifika.
Nazitafuta dalili,
Za bashasha na adili,
Na pendo bila ubahili,
Nikatakwa, nikataka.
Nazitafuta amali,
Za majibu na maswali,
Kuzijenga zetu hali,
Toka chini, juu tukafika.
Naitafuta asali,
Toka nyuki wa asili,
Na sio ile ya kunakili,
Nilambe na kutosheka!
Sitaki nafuu ghali,
Nikajabwagwa chali,
Bila kisomo cha Laili,
Nyota njema ikishuka.
Sitaki cha bilkuli,
Ima fa ima kivuli,
Cha mshaka ya samli,
Kupika kisichopikika.
Sitaki kiwiliwili,
Nataka yako akili,
Inifanye mie kamili,
Kiroho pia kimwili!
skip to main |
skip to sidebar
Mkusanyiko wa makala za jina kama hili zilizochapishwa katika gazeti la majira kati ya 1994-2004. Zichukuliwe kama ushahidi kuwa wapo walioona na kusema, lakini hapakuwa na wa kuwaona au kuwasikiliza. Ninaamini maendeleo yoyote ni mazungumzo na vitendo vya uwazi, yenye nia njema, viisivyo na ubinafsi wala ulaghai ndani yake wa kutaka kuwanufaisha watu fulani na kuwadhulumu au kuwanyima watu wengine haki, usawa, neema na ustawi.
No comments:
Post a Comment